अभिलाष गुप्ता
बीरगंज ०३ मंसिर
लायन्स क्लब बिरगंज परिवारको पहलमा लायन्स इन्टरनेशनल डिस्ट्रीक्ट ३२५ एसको एरिया–३ र सामुदायिक आँखा केन्द्र, बीरगंजबीच “Mission 5000 Eye Cataract Operation” नारासहित ५,००० जना बिरामीको निःशुल्क मोतियाबिन्दु सल्यक्रिया गर्न सम्झौता भएको छ।
सम्झौता कार्यक्रमपछि एरिया–३ का एरिया चिफ लायन रामेश्वर प्रसाद गुप्ताले यो परियोजनाले समग्र एरियामा ठूलो सेवाको भूमिका निर्वाह गर्ने विश्वास व्यक्त गरे। उनले लायन्स क्लबहरू द्वारा सञ्चालन हुने विभिन्न सामुदायिक सेवामा आँखा उपचार विशेष प्राथमिकतामा रहेको उल्लेख गरे।
यस परियोजनाअन्तर्गत क्याम्प व्यवस्थापन तथा आयोजनाको सम्पूर्ण जिम्मेवारी एरिया–३ का लायन्स क्लबहरूले वहन गर्नेछन्। त्यस्तै टेक्निकल समन्वय, उपचार, चिकित्सकको व्यवस्था, सल्यक्रिया र आवश्यक चस्मा वितरण लगायतका सम्पूर्ण प्राविधिक काम सामुदायिक आँखा केन्द्र, बीरगंजले गर्नेछ भन्ने जानकारी जिल्ला ३२५ एसका फर्स्ट भाइस डिस्ट्रीक्ट गभर्नर लायन राम बिहारी पाण्डेले दिए।
लायन्स क्लब बिरगंज परिवारका अध्यक्ष लायन नरोत्तम पाण्डेका अनुसार लायन्स क्लवले विगत अनेक वर्षदेखि आँखा स्वास्थ्यका क्षेत्रमा सेवा प्रदान गर्दै आएको छ। यही निरन्तरतामा यस वर्ष पनि मोतियाबिन्दु रोगीहरूलाई बढीभन्दा बढी लाभ पुगोस भन्ने उद्देश्यका साथ ‘मिशन 5000’ परियोजना अघि सारिएको बताइयो। उनले कार्यक्रममा सामेल सबै क्लबहरूको यो काम समाजसेवाप्रतिको प्रतिबद्धताको प्रतिक भएकामा जोड दिए।
यसैगरी डिस्ट्रीक्टका एक्जिक्युटिभ चिफ लायन बासु तिमलसिनाले लायन्सका हरेक सेवामूलक कार्य सामूहिक एकता र समर्पणबाट सम्पन्न हुने कुरा उल्लेख गर्दै समाजका पीडित र असहाय वर्गलाई निरन्तर सेवा दिनुपर्ने आवश्यकता बताए।
जिल्ला बारा र पर्साका मोतियाबिन्दु पीडित बिरामीहरूको सल्यक्रिया बीरगंज सामुदायिक आँखा केन्द्रमै गरिनेछ। केन्द्रका मेडिकल सुपरिटेन्डेन्ट महेश सिंह धामीले आधुनिक प्रविधि र दक्ष चिकित्सकको सहयोगमा उच्च गुणस्तरको सेवा प्रदान गरिने जानकारी दिए।
