रौतहट । रौतहटको बौधीमाई नगरपालिकाअन्तर्गत रहेको श्री शंकर माध्यमिक विद्यालयमा राहत शिक्षक कोटामा गरिने नियुक्ति पारदर्शी, निष्पक्ष र योग्यताका आधारमा हुनुपर्ने माग स्थानीय हरुलेउठाइएको छ।
राहत शिक्षक कोटामा नियुक्ति गर्दा कुनै पनि व्यक्तिलाई मनोमानी ढंगले नियुक्त गर्नुको सट्टा सार्वजनिक सूचना प्रकाशित गरी प्रतिस्पर्धात्मक परीक्षासहित अन्तर्वार्तामार्फत योग्य शिक्षक छनोट गर्नुपर्ने माग गरिएको छ।
राहत शिक्षक कोटामा धेरै योग्य तथा इच्छुक उम्मेदवारहरू रहेको अवस्थामा सबैलाई समान अवसर प्रदान गर्नु आवश्यक रहेको सरोकारवालाहरूको भनाइ छ। शिक्षक नियुक्तिमा शैक्षिक योग्यता, शिक्षण क्षमता, अनुभव र आवश्यक मापदण्डलाई प्राथमिकता दिनुपर्नेमा जोड दिइएको छ।
विद्यालयमा शिक्षक नियुक्ति गर्दा व्यक्तिगत स्वार्थ, आर्थिक प्रलोभन वा भोट बैंकको राजनीतिलाई आधार बनाइएको भए त्यसबारे निष्पक्ष छानबिन हुनुपर्ने मागसमेत गरिएको छ। यस्ता विषयमा प्रमाणित अनियमितता देखिएमा प्रचलित कानुनअनुसार सम्बन्धित जिम्मेवार व्यक्तिमाथि कारबाही हुनुपर्ने माग उठाइएको छ।
विद्यार्थीको भविष्यसँग खेलवाड गर्न पाइँदैन
विद्यालय शिक्षाको गुणस्तर सुधार गर्न योग्य, दक्ष र जिम्मेवार शिक्षकको आवश्यकता हुन्छ। शिक्षक नियुक्तिमा पारदर्शिता र निष्पक्षता कायम हुन नसके त्यसले विद्यालयप्रतिको विश्वास तथा विद्यार्थीको शैक्षिक भविष्यमा असर पार्न सक्ने भएकाले यस विषयलाई गम्भीरतापूर्वक लिनुपर्ने आवश्यकता देखिन्छ।
यसै सन्दर्भमा सम्बन्धित शिक्षा शाखा, नगरपालिका तथा अन्य सरोकारवाला निकायलाई राहत शिक्षक नियुक्तिको प्रक्रिया, छनोटका आधार र आवश्यक शैक्षिक योग्यताबारे स्पष्ट जानकारी सार्वजनिक गर्न माग गरिएको छ।
यदि नियुक्ति प्रक्रिया निर्धारित मापदण्डविपरीत भएको पाइएमा त्यसको छानबिन गरी कानुनअनुसार आवश्यक कदम चाल्नसमेत सम्बन्धित निकायसँग आग्रह गरिएको छ।
निष्पक्ष नियुक्ति, योग्य शिक्षक र गुणस्तरीय शिक्षा नै विद्यार्थीको उज्ज्वल भविष्यको आधार हो। त्यसैले श्री शंकर माध्यमिक विद्यालयमा राहत शिक्षक नियुक्ति प्रक्रिया पारदर्शी, प्रतिस्पर्धात्मक र नियमसम्मत बनाउन सम्बन्धित निकायले समयमै ध्यान दिन आवश्यक छ।
