राहुल गुप्ता /वीरगंज
जिल्ला प्रहरी कार्यालय रौतहटमा कार्यरत प्रहरी सहायक निरीक्षक (असई) रागनी कुमारी यादव देशभरका महिला प्रहरी मध्ये ‘सर्वोत्कृष्ट प्रहरी’घोषित भएकी छन्। रौतहटको गरुडा स्थित इलाका प्रहरी कार्यालयमा दरबन्दी भई हाल जिल्ला प्रहरी कार्यालयमा सेवा देइरहेकी यादवले लैंगिक हिंसा नियन्त्रण तथा पीडितमैत्री सेवा प्रवाहमा देखाएको समर्पणका आधारमा यो सम्मान पाएकी हुन्।
लैंगिक हिंसा विरुद्धको १६ दिने अभियान अन्तर्गत काठमाडौंमा आयोजित राष्ट्रिय समारोहमा प्रहरी महानिरीक्षक (आईजीपी) दानबहादुर कार्कीले यादवलाई ४० हजार रुपैयाँ नगद पुरस्कार तथा प्रशंसापत्र प्रदान गर्दै सम्मानित गरेका थिए।
नेपाल प्रहरीले अघि सारेको विभागीय नीति–निर्देशिका र आदेशहरूको आदर्श पालना गर्दै महिला, बालबालिका तथा ज्येष्ठ नागरिक सेवा केन्द्रमा कार्यरत असई यादवले लैंगिक हिंसा न्यूनीकरण, पीडितलाई सहज पहुँच, र लैंगिक उत्तरदायी प्रहरी सेवा प्रवाहमा उल्लेखनीय योगदान प्रदान गरेकी थिइन्। त्यही कार्यसम्पादन, समर्पण र नेतृत्व क्षमताका कारण उनी राष्ट्रकै उत्कृष्ट प्रहरीका रूपमा छनोट समितिद्वारा पहिलो स्थान हासिल गर्न सफल भइन्।
गत आर्थिक वर्ष २०८१/८२ को लैंगिक हिंसाको तथ्याङ्क सार्वजनिक कार्यक्रमको अवसरमा देशभरका सेवा केन्द्रहरूमा कार्यरत प्रहरीमध्ये उत्कृष्ट कार्यसम्पादनको आधारमा छनोट गरिँदै उनलाई पहिलो पुरस्कार प्रदान गरिएको हो।
यस्तै, दोस्रो स्थानमा प्रहरी चौकी बालकोट, अर्घाखाँचीमा दरबन्दी भई हाल जिल्ला प्रहरी कार्यालय कपिलवस्तुमा कार्यरत प्रहरी जवान शान्ता खत्रीले ३० हजार रुपैयाँ नगद पुरस्कार प्राप्त गरिन्।
त्यसैगरी,तेस्रो स्थानमा जिल्ला प्रहरी कार्यालय सिन्धुलीमा कार्यरत प्रहरी हवलदार उमा तामाङलाई २० हजार रुपैयाँ र प्रशंसापत्र सहित सम्मानित गरिएको छ।
यसै क्रममा,प्रहरी नायब निरीक्षक पूर्णिमा थापा तथा प्रहरी सहायक निरीक्षक साजना प्रसाईलाई १०–१० हजार रुपैयाँसहित सान्त्वना पुरस्कार प्रदान गरिएको छ।
