अभिलाष गुप्ता
वीरगंज १४ मंसिर
वीरगंज–रक्सौल जोड्ने मितेरीपुल, जो नेपाल–भारतको आपसी प्रेम, सद्भाव र मित्रताको अद्वितीय प्रतीकका रूपमा चिनिन्छ, जहाँ दैनिक ३५ देखि ४० हजार मानिसहरूको अवागमन हुने गर्दछ, त्यसै महत्वपूर्ण क्षेत्रमा आज एक भव्य संयुक्त सरसफाइ तथा वृक्षारोपण कार्यक्रम सम्पन्न गरिएको छ।
वीरगंज महानगरपालिकाको आयोजनामा तथा सशस्त्र प्रहरी बल नेपाल, जिल्ला प्रहरी कार्यालय, ग्रीन सिटी सामुदायिक प्रहरी सेवा केन्द्र आदर्शनगर र भारत–नेपाल सीमाको सुरक्षा गर्ने भारतीय सुरक्षा बल (SSB) ४७ बटालियनको उल्लेखनीय सहकार्यमा कार्यक्रम सम्पन्न भएको हो।
कार्यक्रमको अध्यक्षता ग्रीन सिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतानले गरेका थिए। साथै, सशस्त्र प्रहरी भन्सार गुल्मका डिएसपी पुरुषोत्तम भण्डारीको विशेष उपस्थितिमा कार्यक्रमको औपचारिकता सम्पन्न भएको थियो।
यस अवसरमा एसएसबी ४७ बटालियनका कमाण्डिङ अफिसर (CO) संजय रावत, डिपुटी कमाण्डेन्ट दीपक कृष्णा (DY), डिपुटी कमाण्डेन्ट नवीन कुमार (DY) लगायतका भारतिय सुरक्षा अधिकारी तथा विभिन्न निकायका प्रतिनिधिहरूको सम्मानजनक उपस्थिति रहेको थियो।
कार्यक्रममा नगर प्रहरी, सशस्त्र प्रहरी, सामुदायिक प्रहरी, महानगरका कर्मचारी, स्वच्छता स्वयंसेवक तथा सञ्चारकर्मीहरू सक्रिय रूपमा सहभागी भएका थिए।सरसफाइले मितेरीपुल आसपासको क्षेत्रलाई थप व्यवस्थित बनाएको छ भने वृक्षारोपणले सीमाक्षेत्रलाई हराभरा र वातावरणमैत्री बनाउने लक्ष्यलाई अघि बढाएको छ।
सहभागी निकायका प्रतिनिधिहरूले सीमाक्षेत्रलाई सफा, सुरक्षित र हराभरा राख्न नियमित रूपमा यस्ता अभियान जारी राखिने प्रतिवद्धता व्यक्त गरेका छन्।
