रौतहट, साउन २५ — अशोक यादव।
रौतहटको फतुवा विजयपुर नगरपालिका–१०, दुधिअवा गाउँनजिकै सोमबार बिहान विद्युत् सर्ट भएर आगलागी हुँदा ९ वटा ग्यास सिलिन्डर पड्किएका छन्। आगलागीबाट घरमा रहेका घरायसी तथा अन्य सामग्री जलेर नष्ट हुँदा करिब १८ लाख ५८ हजार रुपैयाँ बराबरको क्षति भएको प्रारम्भिक अनुमान गरिएको छ।
स्थानीयका अनुसार दुधिअवा गाउँनजिकै दीपेन्द्र भक्त खरेलको घरमा इँटा उद्योगमा काम गर्ने मजदुरहरूको सुविधाका लागि ग्यास सिलिन्डर तथा अन्य सामग्री राखिएको स्थानमा बिहान करिब ७ः१५ बजे विद्युत् सर्ट भएर आगलागी भएको हो।
आगलागी भएपछि त्यहाँ रहेका ग्यास सिलिन्डर पड्किन थालेपछि आगो थप फैलिएको थियो। सिलिन्डर पड्किँदा ठूलो आवाजसहित आगो फैलिएको स्थानीयले बताएका छन्।
आगलागी नियन्त्रणका लागि स्थानीयवासीसँगै नेपाल प्रहरी, सशस्त्र प्रहरी र दमकल परिचालन गरिएको थियो। प्रहरी तथा स्थानीयको सक्रियतामा आगो नियन्त्रणमा लिइएको इलाका प्रहरी कार्यालय विजयपुरका प्रहरी निरीक्षक राजेश खत्रीले जानकारी दिनुभयो।
आगलागीबाट घरमा रहेका विभिन्न घरायसी सामान तथा अन्य सामग्री जलेर नष्ट भएको प्रहरीले जनाएको छ। घटनाबाट भएको क्षतिको प्रारम्भिक अनुमान करिब १८ लाख ५८ हजार रुपैयाँ गरिएको भए पनि वास्तविक क्षतिको विवरण संकलन भइरहेको प्रहरीले जनाएको छ।
घटनामा मानवीय क्षति भए/नभएकोबारे थप विवरण आउन बाँकी रहेको छ। प्रहरीले आगलागीको कारण तथा क्षतिको थप विवरण संकलन गरिरहेको जनाएको छ।
