अभिलाष गुप्ता
वीरगञ्ज, २२ जेठ
विश्व वातावरण दिवस २०८३ को अवसरमा काव्या एकेडेमीका विद्यार्थीहरूले विद्यालय परिसरमा वृक्षारोपण कार्यक्रम आयोजना गर्दै वातावरण संरक्षणप्रति आफ्नो प्रतिबद्धता व्यक्त गरेका छन्।
विद्यालयको आयोजनामा सम्पन्न उक्त कार्यक्रममा विद्यार्थी, शिक्षक तथा विद्यालय परिवारको सक्रिय सहभागिता रहेको थियो। कार्यक्रमअन्तर्गत विद्यालय परिसरमा विभिन्न प्रजातिका बिरुवाहरू रोपिएका थिए। वृक्षारोपणमार्फत विद्यार्थीहरूलाई वातावरण संरक्षणको महत्वबारे जानकारी गराउनुका साथै हरित वातावरण निर्माणमा योगदान पुर्याउने उद्देश्य राखिएको विद्यालयले जनाएको छ।
कार्यक्रममा सहभागी विद्यार्थीहरूले वृक्षारोपण केवल एक दिनको गतिविधि नभई भावी पुस्ताका लागि स्वच्छ, हरित र स्वस्थ वातावरण निर्माण गर्ने महत्वपूर्ण अभियान भएको बताएका थिए। उनीहरूले प्रकृतिको संरक्षण, जैविक विविधताको संवर्द्धन तथा जलवायु परिवर्तनका चुनौती न्यूनीकरणका लागि वृक्षारोपण आवश्यक रहेको धारणा व्यक्त गरे।
विद्यालय प्रशासनले वातावरण संरक्षणमा विद्यार्थीहरूको उत्साहजनक सहभागिताको प्रशंसा गर्दै यस्ता कार्यक्रमले बालबालिकामा सामाजिक उत्तरदायित्व तथा प्रकृतिप्रतिको प्रेम विकास गर्न महत्वपूर्ण भूमिका खेल्ने विश्वास व्यक्त गरेको छ।
विश्व वातावरण दिवसको सन्देशलाई आत्मसात् गर्दै काव्या एकेडेमीले वातावरणीय सचेतना अभिवृद्धि तथा हरियाली प्रवर्द्धनका लागि आगामी दिनमा पनि यस्ता कार्यक्रमलाई निरन्तरता दिने जनाएको छ।
“रुख रोपौं, प्रकृति जोगाऔं, भविष्य सुरक्षित बनाऔं” भन्ने मूल सन्देशका साथ सम्पन्न कार्यक्रमले वातावरण संरक्षणमा सबैको साझा जिम्मेवारी रहेको सन्देश प्रवाह गरेको छ।
