कोलकाता । भारतका वैज्ञानिकहरूको प्रमुख तथा ऐतिहासिक संस्थामध्ये एक भारतीय विज्ञान कांग्रेस संगठन (आईएससीए) को बिहारका वरिष्ठ पत्रकार, मानवअधिकार टुडेका सम्पादक तथा वैशाली अन्तर्राष्ट्रिय विद्यापीठका संस्थापक डा. शशि भूषण कुमार ले भ्रमण गरेका छन्।
डा. कुमार संस्थाको कार्यालय पुगेको जानकारी प्राप्त भएपछि भारतीय विज्ञान कांग्रेस संगठनका राष्ट्रिय कार्यकारी सचिव डा. अतुल कुमार ले उहाँलाई स्वागत गर्दै संस्थाको इतिहास, उद्देश्य तथा गतिविधिबारे जानकारी गराउनुभयो।
सो अवसरमा डा. अतुल कुमारले भारतीय विज्ञान कांग्रेस संगठनको स्थापना सन् १९१४ मा दुई ब्रिटिश रसायनशास्त्री प्रोफेसर जे.एल. सिमोनसेन र प्रोफेसर पी.एस. म्याकमोहन द्वारा गरिएको बताउनुभयो। उहाँका अनुसार संस्थाको मुख्य उद्देश्य भारतमा वैज्ञानिक अनुसन्धानलाई प्रवर्द्धन गर्नु तथा वार्षिक विज्ञान सम्मेलनहरूको आयोजना गर्नु हो।
उहाँले सन् १९१४ जनवरी १५ देखि १७ सम्म तत्कालीन कलकत्ता (हाल कोलकाता) स्थित एशियाटिक सोसाइटीमा पहिलो अधिवेशन सम्पन्न भएको जानकारी दिनुभयो। उक्त अधिवेशनको अध्यक्षता तत्कालीन कलकत्ता विश्वविद्यालयका कुलपति सर आशुतोष मुखर्जी ले गर्नुभएको थियो।
डा. अतुल कुमारले संस्थाले विज्ञानलाई लोकप्रिय बनाउने, वैज्ञानिक चेतनाको विकास गर्ने, हरेक वर्ष जनवरीको पहिलो साता वार्षिक विज्ञान कांग्रेस आयोजना गर्ने तथा विज्ञानसम्बन्धी पत्रपत्रिका, अनुसन्धान प्रतिवेदन र अन्य प्रकाशनहरू प्रकाशित गर्ने कार्य गर्दै आएको बताउनुभयो। उक्त विज्ञान कांग्रेसमा भारतका प्रधानमन्त्रीसहित देश–विदेशका ख्यातिप्राप्त वैज्ञानिकहरूको सहभागिता रहने गरेको उहाँले उल्लेख गर्नुभयो।
भ्रमणका क्रममा डा. शशि भूषण कुमारले वैशाली अन्तर्राष्ट्रिय विद्यापीठ तथा मानवअधिकार टुडेको तर्फबाट डा. अतुल कुमारलाई सम्मानस्वरूप अंगवस्त्र प्रदान गर्दै आगामी अन्तर्राष्ट्रिय अधिवेशनमा वैशाली भ्रमणका लागि निमन्त्रणा दिनुभयो। उक्त निमन्त्रणालाई डा. अतुल कुमारले सहर्ष स्वीकार गर्नुभएको बताइएको छ।
दुवै पक्षबीच भएको छलफलमा डा. कुमारले वैशाली अन्तर्राष्ट्रिय विद्यापीठका उद्देश्य तथा गतिविधिबारे विस्तृत जानकारी गराउनुभएको थियो। विशेषगरी मातृभाषा, संस्कृति संरक्षण तथा प्रवर्द्धनका क्षेत्रमा विद्यापीठले गरिरहेको कार्यको डा. अतुल कुमारले प्रशंसा गर्नुभयो।
कार्यक्रममा वैशाली अन्तर्राष्ट्रिय विद्यापीठकी उपनिर्देशक डा. उर्वशी श्रीवास्तव, भारतीय विज्ञान कांग्रेस संगठनका डा. पाण्डे तथा मानवअधिकार टुडेका पत्रकार आदिल प्रवेश लगायतको उपस्थिति रहेको थियो।
