वीरगंज/२४ वैशाख
त्रिभुवन राजपथअन्तर्गत वीरगंजको मुख्य सडक (मेनरोड) विस्तार गर्ने स्थानीय प्रशासन र सडक विभागको तयारीविरुद्ध घरधनीहरू आन्दोलित भएका छन्। बिहीबार मुख्य सडकका बासिन्दा तथा घरधनीहरूले ‘डोजर आतंक’ बन्द गर्न माग गर्दै सडकमा मानवसाङ्लो निर्माण गरी विरोध प्रदर्शन गरेका हुन्।
गण्डकदेखि मितेरी पुलसम्मको व्यापारिक हबका रूपमा रहेको मुख्य सडकका घरधनीहरूले विकासको नाममा आफ्नो उठीबास लगाउन खोजिएको भन्दै आक्रोश व्यक्त गरे। उनीहरूले हातमा हात मिलाएर मानवसाङ्लो बनाउँदै सडकको दुवैतर्फ प्रदर्शन गरेका थिए।
प्रदर्शनकारीहरूले “हामी विकास र विस्तार चाहन्छौँ, तर वैकल्पिक उपाय खोजौँ”, “विकासको नाममा विनाश गर्न पाइँदैन” र “वीरगंजको मेनरोडलाई शहरी मार्ग कायम गर” जस्ता नारा लेखिएका प्लेकार्ड बोकेका थिए।
विरोध सभालाई सम्बोधन गर्दै स्थानीय घरधनीहरूले दशकौँ पुराना तथा कानुनी प्रक्रिया पूरा गरेर निर्माण गरिएका घरहरू भत्काइँदा वीरगंजको अर्थतन्त्र र इतिहास नै समाप्त हुने दाबी गरे। उनीहरूले त्रिभुवन राजपथको वैकल्पिक मार्ग (बाइपास रोड) यसअघि नै सञ्चालनमा आइसकेकाले मुख्य बजार क्षेत्रको सडकलाई विस्तार नगरी ‘सहरी मार्ग’ (अर्बन रोड) का रूपमा विकास गर्नुपर्ने माग राखेका छन्।
पूर्वमेयर विजय सरावगीले “हामी विकासको विरोधी होइनौँ, तर हजारौँ परिवारलाई सुकुम्बासी बनाएर गरिने विस्तार न्यायसंगत छैन,” भन्दै सरकारलाई वैज्ञानिक अध्ययन, उचित मुआब्जा तथा वैकल्पिक व्यवस्थाको विषयमा गम्भीर बन्न आग्रह गरे। “बिना योजना डोजर चलाउनु हुँदैन,” उनले भने।
मुख्य सडक विस्तारको चर्चाले वीरगंजको प्रमुख व्यापारिक क्षेत्रमा सन्त्रास फैलिएको छ। स्थानीय प्रशासनले भने सडक सीमाभित्र रहेका संरचनाहरू हटाउन सूचना जारी गरिसकेको छ।
यता, घरधनीहरूले आफ्नो माग सम्बोधन नभएसम्म तथा उपयुक्त विकल्प नआएसम्म आन्दोलन जारी रहने चेतावनी दिएका छन्। यस प्रदर्शनले वीरगञ्जको सडक विस्तार योजना र स्थानीयको सम्पत्तिको हकबीचको टकरावलाई थप सतहमा ल्याएको छ।
