बारा, कलैया । बारा जिल्लाको कलैयास्थित यातायात व्यवस्था कार्यालयले लामो समयदेखि प्रतीक्षामा रहेका सेवाग्राहीहरूलाई लक्षित गर्दै स्मार्ट सवारी चालक अनुमति पत्र (लाइसेन्स) वितरण कार्यलाई तीव्रता दिएको छ। आजदेखि सुरु गरिएको वितरण कार्यक्रम सार्वजनिक बिदाका दिनमा समेत निरन्तर सञ्चालन हुने भएकोले सेवाग्राहीहरूलाई थप सहजता मिल्ने अपेक्षा गरिएको छ।
कार्यालयका प्रमुख चिन्तन आचार्यका अनुसार यातायात व्यवस्था विभागबाट छपाइ भई आएका नयाँ लाइसेन्स, नवीकरण गरिएका, वर्ग थप गरिएका तथा प्रतिलिपि सम्बन्धी सबै स्मार्ट कार्ड क्रमिक रूपमा वितरण गरिनेछ। वैशाख १८ देखि २० गतेसम्म पर्ने सार्वजनिक बिदाका दिनमा पनि बिहान १० बजेदेखि साँझ ५ बजेसम्म वितरण कार्य सञ्चालन गरिने उनले जानकारी दिए।
लामो समयदेखि स्मार्ट लाइसेन्सको प्रतीक्षामा रहेका सेवाग्राहीहरूका लागि यो निर्णय निकै राहतपूर्ण भएको छ। कार्यालयका अनुसार ठूलो सङ्ख्यामा स्मार्ट कार्ड प्राप्त भएकाले व्यवस्थापनलाई सहज बनाउँदै चरणबद्ध रूपमा वितरण प्रक्रिया अघि बढाइएको छ।
कार्ड लिनका लागि सेवाग्राही स्वयं उपस्थित हुनुपर्नेछ। साथै, पुरानो सवारी चालक अनुमति पत्र (भएमा) वा राजस्व तिरेको सक्कल रसिद अनिवार्य रूपमा साथमा ल्याउनुपर्ने व्यवस्था गरिएको कार्यालयले जनाएको छ।
यस पहलबाट बारा तथा आसपासका क्षेत्रमा रसिदका आधारमा सवारी चलाउँदै आएका हजारौं सेवाग्राहीहरू प्रत्यक्ष लाभान्वित हुने विश्वास गरिएको छ। कार्यालयले सेवाग्राहीलाई तोकिएको समयमै उपस्थित भई आवश्यक कागजातसहित सेवा लिन आग्रह गरेको छ।
