वीरगंज, १९ माघ
पर्सा जिल्ला निर्वाचन क्षेत्र नम्बर–२ अन्तर्गत जनता समाजवादी पार्टी (जसपा) का उम्मेदवार अशोक कुमार टेमानीले मंगलबार पर्सागढ नगरपालिका वडा नम्बर–३ बढनियारमा घरदैलो कार्यक्रम सम्पन्न गरेका छन्।
घरदैलोका क्रममा टेमानीले स्थानीय मतदातासँग प्रत्यक्ष भेटघाट गर्दै आफ्नो चुनावी एजेन्डा र भावी योजनाबारे जानकारी गराएका थिए। शिक्षा, स्वास्थ्य, रोजगारी तथा पूर्वाधार विकासलाई प्राथमिकतामा राखेर अघि बढ्ने प्रतिबद्धता व्यक्त गर्दै उनले जनताको सुख–दुःखमा सधैं साथ रहने बताए।
कार्यक्रमका क्रममा विशेष गरी युवाहरूको उल्लेखनीय सहभागिता देखिएको थियो। युवाहरूले परिवर्तन, समावेशी राजनीति र मधेशको अधिकारका विषयमा चासो देखाउँदै जसपाको चुनाव चिन्ह छाता छापप्रति आकर्षण बढ्दै गएको प्रतिक्रिया दिएका छन्।
स्थानीय बासिन्दाहरूले यसअघि निर्वाचित प्रतिनिधिहरूले अपेक्षा अनुसार काम गर्न नसकेको गुनासो गर्दै यसपटक नयाँ सोच र प्रतिबद्ध नेतृत्वलाई अवसर दिनुपर्ने धारणा राखेका थिए। टेमानीको सरल व्यवहार र स्पष्ट दृष्टिकोणले आफूहरू प्रभावित भएको उनीहरूको भनाइ थियो।
घरदैलो कार्यक्रमले बढनियार क्षेत्रमा जसपाको संगठन थप मजबुत बन्दै गएको संकेत देखिएको छ भने आगामी निर्वाचनमा छाता छापप्रति जनसमर्थन बढ्दै गएको राजनीतिक विश्लेषकहरू बताउँछन्।
