वीरगञ्ज/१४ साउन
पूर्वराजा श्री ५ महाराजाधिराज ज्ञानेन्द्र वीर विक्रम शाहदेवले नेपाली समाजको धार्मिक, सांस्कृतिक तथा सामाजिक विविधतालाई राष्ट्रको पहिचान र गौरवका रूपमा संरक्षण गर्नुपर्ने बताएका छन्। साउन १४ गते निर्मल निवासस्थित संवाद सचिवालयमार्फत जारी गरिएको सद्भाव सन्देशमा उहाँले नेपालीहरू प्राचीनकालदेखि नै आपसी मेलमिलाप, प्रेम, सहिष्णुता र सद्भावका साथ बस्दै आएको उल्लेख गर्नुभएको छ।
सन्देशमा नेपाल बहुजातीय, बहुभाषिक तथा बहुधार्मिक मुलुक भएको उल्लेख गर्दै प्रत्येक समुदायका आफ्नै धर्म, संस्कृति, परम्परा र रीतिरिवाजप्रति सम्मान कायम राख्नु सबै नेपालीको साझा दायित्व भएको बताइएको छ। यिनै विविध विशेषताले विश्व समुदायमा नेपालको विशिष्ट पहिचान र सम्मान स्थापित भएको भन्दै कुनै पनि कारणले यसमा खलल पुग्ने कार्य स्वीकार्य नहुने धारणा व्यक्त गरिएको छ।
पूर्वराजा ज्ञानेन्द्रले केही दिनअघि सुनसरी जिल्लाका केही गाउँबस्तीमा भएको आपसी द्वन्द्व र विवादका कारण जनधनको क्षति भएको तथा त्यसको प्रभाव कोशी क्षेत्र हुँदै तराईका विभिन्न भूभागसम्म फैलिएको घटनाप्रति गहिरो दुःख व्यक्त गर्नुभएको छ। नेपालजस्तो सामाजिक सद्भाव कायम रहेको मुलुकमा यस्ता अवाञ्छित घटना र दुर्घटना हुनु चिन्ताजनक भएको उहाँको भनाइ छ।
उहाँले यस्ता गतिविधि नेपाली समाजका मौलिक मूल्य, मान्यता र सहअस्तित्वको भावनाविपरीत रहेको उल्लेख गर्दै देशका सबै भूभागमा बसोबास गर्ने नेपालीहरूबीच एकता, मेलमिलाप र पारस्परिक सद्भाव कायम राख्न सबैलाई आग्रह गर्नुभएको छ।
सन्देशको अन्त्यमा “हामी नेपाली मिलौँ, राष्ट्रिय एकता र सामाजिक सद्भावलाई अझ सुदृढ बनाऔँ, यही आजको आवश्यकता हो” भन्ने भाव व्यक्त गर्दै “जय नेपाल” उल्लेख गरिएको छ। उक्त सन्देश निर्मल निवासस्थित संवाद सचिवालयमार्फत सार्वजनिक गरिएको हो।
