रक्सौल। भारत विकास परिषद्, शाखा रक्सौलले शनिबार स्वामी विवेकानन्दको १२४औँ पुण्यतिथि श्रद्धा, सम्मान र प्रेरणामूलक वातावरणमा मनाएको छ। लक्ष्मीपुरस्थित महाराजा बैंक्वेट हलमा आयोजित कार्यक्रममा परिषद्का पदाधिकारी तथा सदस्यहरूले स्वामी विवेकानन्द र भारत माताको तस्बिरमा पुष्पाञ्जली अर्पण गर्दै उहाँप्रति भावपूर्ण श्रद्धाञ्जली व्यक्त गरेका थिए। कार्यक्रम ‘वन्दे मातरम्’ गीतबाट सुरु भएको थियो।
कार्यक्रमलाई सम्बोधन गर्दै शाखा अध्यक्ष रजनीश प्रियदर्शीले स्वामी विवेकानन्द भारतको आध्यात्मिक चेतना, सांस्कृतिक गौरव र राष्ट्रवादका अमर प्रतीक भएको बताए। उहाँले स्वामी विवेकानन्दका ओजस्वी विचारले विश्व समुदायसमक्ष भारतीय संस्कृति र सभ्यताको वास्तविक स्वरूप उजागर गरेको उल्लेख गरे।
अध्यक्ष प्रियदर्शीले युवाहरूलाई स्वामी विवेकानन्दको आदर्श, अनुशासन, चरित्र, आत्मविश्वास र राष्ट्रसेवाको भावनालाई जीवनमा आत्मसात गर्न आग्रह गर्दै यिनै मूल्यको अनुसरणबाट मात्रै भारतलाई पुनः विश्व नेतृत्वको स्थानमा पुर्याउन सकिने धारणा व्यक्त गरे। उनले भारत विकास परिषद् स्वामी विवेकानन्दका विचारबाट प्रेरित हुँदै राष्ट्रको सांस्कृतिक, सामाजिक तथा आध्यात्मिक उत्थानका लागि निरन्तर क्रियाशील रहेको पनि बताए।
शाखा सचिव नरेश कुमार तथा सेवा संयोजक एवं मिडिया इन्चार्ज विमलकुमार सर्राफले स्वामी विवेकानन्दको सम्पूर्ण जीवन युवापुस्ताका लागि प्रेरणाको अक्षय स्रोत भएको बताए। उहाँहरूले स्वामीजीका विचारले राष्ट्र निर्माणको अभियानलाई निरन्तर मार्गदर्शन गरिरहेको उल्लेख गर्दै प्रत्येक युवाले उहाँको आदर्शलाई व्यवहारमा उतार्ने संकल्प गर्नुपर्नेमा जोड दिए।
संस्कार संयोजक नितेश कुमार सिंहले स्वामी विवेकानन्द भारत माताप्रति समर्पित महान् व्यक्तित्व र युवाहरूका आदर्श भएको उल्लेख गर्दै उहाँका सिद्धान्तलाई आत्मसात गरेमा भारत पुनः विश्वगुरुको स्थानमा पुग्न सक्ने विश्वास व्यक्त गरे।
सम्पर्क संयोजक उमेश सिकारिया तथा संगठन सचिव अजय कुमारले स्वामी विवेकानन्दप्रति साँचो श्रद्धाञ्जली भनेको उहाँका सिद्धान्त, आदर्श र राष्ट्रसेवाको सन्देशलाई व्यवहारमा लागू गर्दै समाज र राष्ट्रको समग्र विकासका लागि निरन्तर समर्पित हुनु रहेको बताए।
कार्यक्रममा परिषद्का सदस्यहरू योगेन्द्र प्रसाद, नरेश कुमार, सुनिल कुमार, उमेश सिकारिया, विमलकुमार सर्राफ, विजयकुमार साह, दिनेश प्रसाद, विनोद कुमार, अरविन्द जायसवाल, सुरेश धानोठिया, प्रशान्त कुमार, अजय कुमार, विनोद रौनियार, जितेन्द्र चौरसिया, विवेक चौरसिया, प्रतीक कुमार, अनुज कुमारलगायतको उपस्थिति रहेको थियो।
कार्यक्रमबारे जानकारी सम्पर्क संयोजक उमेश सिकारिया तथा सेवा संयोजक एवं मिडिया इन्चार्ज विमलकुमार सर्राफले संयुक्त रूपमा दिएका थिए।
