जनकपुरधाम/ ४ बैसाख
मधेश प्रदेशको धनुषा जिल्लास्थित बटेश्वर गाउँपालिका–३ मा रहेको श्री जनशक्ति माध्यमिक विद्यालयको नयाँ विद्यालय भवन निर्माण कार्यको आज शिलान्यास गरिएको छ। उक्त शिलान्यास भारतीय महावाणिज्य दूतावास वीरगञ्जका महावाणिज्यदूत देवी सहाय मीणाले बटेश्वर गाउँपालिकाका अध्यक्ष राम आशिष महतोसँग संयुक्त रूपमा गरेका हुन्।
भारत सरकारको आर्थिक सहयोगमा करिब ३४.५ मिलियन नेपाली रुपैयाँ लागतमा निर्माण हुन लागेको यस विद्यालय भवन उच्च प्रभाव सामुदायिक विकास परियोजना (HICDP) अन्तर्गत सञ्चालन गरिएको हो। नयाँ भवनमा कक्षा कोठा तथा आवश्यक शैक्षिक पूर्वाधारसहित चारतले संरचना रहनेछ।
यस परियोजनालाई धनुषा जिल्लाको बटेश्वर गाउँपालिकामार्फत कार्यान्वयन गरिनेछ। कार्यक्रममा गाउँपालिका अध्यक्ष, विद्यालय व्यवस्थापन समिति तथा स्थानीय सरोकारवालाहरूले भारत सरकारद्वारा प्राप्त सहयोगको प्रशंसा गरेका थिए।
कार्यक्रममा बोल्दै वक्ताहरूले नेपाल र भारतबीचको मैत्रीपूर्ण सम्बन्ध तथा विकास साझेदारीले स्थानीय स्तरमा शिक्षा तथा पूर्वाधार विकासमा महत्वपूर्ण योगदान पुर्याउँदै आएको उल्लेख गरे। साथै, यस्ता परियोजनाले समुदायको समग्र विकासमा टेवा पुर्याउने विश्वास व्यक्त गरिएको थियो।
