वीरगंज। भारतको महावाणिज्य दूतावास, बीरगंज (नेपाल) ले बीरगंज उद्योग वाणिज्य संघसँगको सहकार्यमा “India–Nepal Economic Cooperation: Unlocking New Trade Potential” शीर्षकमा आइतबार एक विशेष संगोष्ठी आयोजना गरेको छ। कार्यक्रममा नेपाल तथा भारतको बिहार राज्यका विभिन्न उद्योग तथा वाणिज्य संघका प्रतिनिधि र पदाधिकारीहरूको उल्लेखनीय सहभागिता रहेको थियो।
कार्यक्रममा दुवै देशका निजी क्षेत्रका प्रतिनिधिहरू, उद्योगी–व्यवसायी तथा सरोकारवाला व्यक्तिहरूको उपस्थिति रहेको थियो। संगोष्ठीले नेपाल–भारतबीचको आर्थिक सहकार्य, व्यापार विस्तार र नयाँ लगानीका सम्भावनाहरूबारे गहन छलफल गर्ने अवसर प्रदान गरेको आयोजकहरूले बताएका छन्।
कार्यक्रमलाई सम्बोधन गर्दै भारतका महावाणिज्यदूत डी.एस. मीनाले भारत–नेपालबीचको ऐतिहासिक, सांस्कृतिक तथा आर्थिक सम्बन्ध अत्यन्त घनिष्ठ रहेको उल्लेख गर्दै दुवै देशबीचको व्यापारिक सहकार्य अझ विस्तार गर्नुपर्नेमा जोड दिनुभयो। उहाँले काठमाडौँस्थित भारतीय राजदूतावास र बीरगंजस्थित भारतीय महावाणिज्य दूतावासले द्विपक्षीय व्यापार र आर्थिक सहकार्यलाई प्रोत्साहन गर्न विभिन्न पहलहरू गर्दै आएको जानकारी दिनुभयो।
महावाणिज्यदूत मीनाले भारत–नेपालबीचको आर्थिक तथा व्यापारिक सम्बन्धको संक्षिप्त सिंहावलोकन प्रस्तुत गर्दै पछिल्ला वर्षहरूमा भारतले विभिन्न आर्थिक क्षेत्रमा उल्लेखनीय प्रगति हासिल गरेको बताउनुभयो। उहाँका अनुसार नेपाली व्यवसायीहरूले भारतीय उद्योग तथा व्यवसायसँग सहकार्य गरेर नयाँ अवसरहरू सिर्जना गर्न सक्ने सम्भावना अत्यन्त व्यापक रहेको छ।
उहाँले दुई देशबीचको व्यापार सहज बनाउन भारत सरकारले विभिन्न पूर्वाधार विकासमा विशेष ध्यान दिएको पनि उल्लेख गर्नुभयो। विशेष गरी एकीकृत जाँच चौकी (Integrated Check Post), सुख्खा बन्दरगाह, रेल सेवा तथा डिजिटल कनेक्टिभिटी जस्ता संरचनाहरूले द्विपक्षीय व्यापारलाई थप सहज र प्रभावकारी बनाउने विश्वास व्यक्त गर्नुभयो।
त्यसैगरी उहाँले स्टार्टअप, सूचना प्रविधि (ICT), पर्यटन, कृषि–प्रशोधन तथा उद्योग क्षेत्रमा संयुक्त उद्यम स्थापना गर्ने ठूलो सम्भावना रहेको बताउँदै निजी क्षेत्रलाई यी क्षेत्रमा नयाँ पहल र सहकार्यको खोजी गर्न आग्रह गर्नुभयो।
संगोष्ठीमा वीरगंज उद्योग वाणिज्य संघका कार्यवाहक अध्यक्ष माधव राजपालले नेपाल–भारतबीचको सीमा व्यापारले स्थानीय अर्थतन्त्रमा महत्वपूर्ण योगदान पुर्याएको उल्लेख गर्दै दुवै देशका उद्योगी–व्यवसायीबीच सहकार्य बढाउन यस्ता कार्यक्रमहरू महत्वपूर्ण हुने बताउनुभयो।
त्यसैगरी बिहार चेम्बर अफ कमर्सका पूर्व अध्यक्ष सुभाष कुमार पटवारीले भारत र नेपालबीचको व्यापारिक सम्बन्ध ऐतिहासिक रूपमा मजबुत रहेको उल्लेख गर्दै नयाँ आर्थिक सम्भावनाहरू खोज्न दुवै देशका निजी क्षेत्रबीच प्रत्यक्ष संवाद र सहकार्य आवश्यक रहेको धारणा राख्नुभयो।
बिहार उद्योग संघका प्रतिनिधि मनीष कुमार, नेपाली उद्योगपति अशोक वैद्य, मधेश प्रदेशका पूर्व मन्त्री तथा बीरगंज उद्योग वाणिज्य संघका पूर्व अध्यक्ष ओमप्रकाश शर्मा र बिहारस्थित रिपु एग्रोका निर्देशक रिपु रमनले पनि कार्यक्रममा आ–आफ्ना धारणा राख्नुभएको थियो।
वक्ताहरूले नेपाल र भारतबीचको आर्थिक सहकार्यलाई अझ सुदृढ बनाउँदै व्यापार विस्तार, लगानी प्रवर्द्धन र औद्योगिक विकासका क्षेत्रमा संयुक्त प्रयास आवश्यक रहेकोमा जोड दिएका थिए। उनीहरूले सीमा क्षेत्रको व्यापार, पूर्वाधार विकास, उद्योग प्रवर्द्धन तथा लगानीका अवसरहरू विस्तार गर्न सहकार्य बढाउनुपर्ने धारणा व्यक्त गरेका थिए।
संगोष्ठीको मुख्य उद्देश्य नेपाल र भारतबीचको आर्थिक सम्बन्धलाई अझ सुदृढ बनाउँदै पारस्परिक लाभका लागि नयाँ अवसरहरूको खोजी गर्नु रहेको आयोजकहरूले बताएका छन्। कार्यक्रममा सहभागीहरूले द्विपक्षीय व्यापार विस्तार गर्ने उपायहरूबारे सकारात्मक अन्तरक्रिया गरेका थिए भने व्यापारिक गतिविधिमा देखिएका विभिन्न चुनौती र समस्याहरू पनि खुलेर साझा गरेका थिए।
कार्यक्रमको अन्त्यमा महावाणिज्यदूत मीनाले नेपाल–भारतबीचको व्यापार तथा आर्थिक सहकार्यलाई अझ सहज बनाउन भारतीय महावाणिज्य दूतावासले आवश्यक समन्वय र सहयोग उपलब्ध गराउने प्रतिबद्धता व्यक्त गर्नुभयो। उहाँले दुवै देशका उद्योगी–व्यवसायीबीच सहकार्य बढ्दै गएमा भविष्यमा नेपाल–भारत आर्थिक सम्बन्ध अझ मजबुत हुने विश्वास व्यक्त गर्नुभयो।
