मोतिहारी/ फाल्गुण ३ गते
महाशिवरात्रिको पर्व देशभर श्रद्धा र भक्ति भावका साथ धूमधामले मनाइँदैछ। श्रद्धालुहरू शिवभक्तिमा सराबोर देखिन्छन्। सहरका मन्दिरहरू रंगीन बत्ती र फूलहरूले सुसज्जित छन्। कतै भजन–कीर्तन, रुद्राभिषेक तथा महामृत्युंजय अखण्ड हवन भइरहेका छन् भने कतै शिव–पार्वती विवाहको बारातको तयारी चलिरहेको छ। मण्डपहरूमा प्रसाद तथा भण्डाराको व्यवस्था गरिएको छ। भक्तजनहरूमा उत्साह र श्रद्धाको अद्भुत संगम देख्न सकिन्छ।
यसैबीच, बिहारको चम्पारणबाट एक अनौठो र भावुक दृश्य सार्वजनिक भएको छ। भारतका चर्चित अन्तर्राष्ट्रिय स्यान्ड तथा लीफ आर्टिस्ट मधुरेन्द्र कुमारले विश्वमा बढ्दो युद्ध र अशान्तिका घटनाबाट व्यथित हुँदै महाशिवरात्रिको अवसरमा भगवान शिवसमक्ष विश्व शान्तिको कामना गरेका छन्।
कलाकार मधुरेन्द्रले शनिबारको पूर्वसन्ध्यामा करिब पाँच घण्टाको कठिन परिश्रमपछि केवल तीन सेन्टिमिटरको हरियो पीपलको पातमा भगवान शिव र माता पार्वतीको मनमोहक आकृति कुँदेर तयार पारे। यस सूक्ष्म कलाकृतिसँगै उनले “विश्व शान्ति” लेख्दै सम्पूर्ण मानव समुदायमा शान्तिको सन्देश प्रवाह गरेका छन्।
आफ्नो यस अनौठो सिर्जनामार्फत कलाकारले भगवान शिवसमक्ष प्रार्थना गरेका छन्—जसरी समुद्रमन्थनका बेला विषपान गरेर सृष्टिको रक्षा गर्नुभयो, त्यसैगरी आज पुनः एकपटक मानवताको रक्षा गर्दै पृथ्वीलाई युद्ध र हिंसाबाट जोगाउन पहल गरून्।
पत्रकारहरूसँग कुराकानी गर्दै मधुरेन्द्र कुमारले महाशिवरात्रि फाल्गुन कृष्ण चतुर्दशीका दिन भगवान शिव र माता पार्वतीको विवाहोत्सवका रूपमा मनाइने बताए। उनका अनुसार यो पर्व शिव र शक्तिको पवित्र मिलनको प्रतीक हो। वर्तमान समयमा विश्व अशान्ति र द्वन्द्वबाट गुज्रिरहेको सन्दर्भमा भगवान शिवको शान्ति, सहिष्णुता र कल्याणको सन्देश अत्यन्त सान्दर्भिक रहेको उनले उल्लेख गरे।
यो कलाकृति अत्यन्त आकर्षक र भावनात्मक भएकाले सामाजिक सञ्जालहरूमा तीव्र रूपमा साझा भइरहेको छ। हेर्दाहेर्दै उक्त तस्वीर भाइरल बनेको छ र कलाकारको यस प्रयासप्रति सर्वसाधारणले प्रशंसा व्यक्त गरेका छन्।
महाशिवरात्रिको पावन अवसरमा मधुरेन्द्र कुमारको यो लीफ आर्ट केवल आस्थाको प्रतीक मात्र नभई विश्व शान्तिको सशक्त सन्देशका रूपमा स्थापित भएको छ।
