अभिलाष गुप्ता
बिरगंज ०६ मंसिर
बिरगंजका निब सरावगीले कम उमेरमै उल्लेखनीय सफलता हासिल गर्दै देश–विदेशका पर्यटकहरूलाई आकर्षित गर्ने लोकप्रिय घोरेपानी–पूँनहिल (३२१० मिटर) ट्रेक सफलतापूर्वक पूरा गरेका छन्।
२०२५ अक्टोबर २४ देखि २७ सम्म चलेको चारदिने यो साहसिक यात्रामा उनले कठिन चढाइ, चिसो मौसम, उकालो भरिएका वन–पगडण्डी तथा विभिन्न शारीरिक चुनौतीहरू पार गर्दै आफ्नो साहस, अनुशासन र दृढ सङ्कल्पको उदाहरण प्रस्तुत गरेका हुन्।
निब् सरावगीलाई नेपालका मरवारी समुदायका सबैभन्दा कम उमेरका ट्रेकरमध्ये एकका रूपमा हेरिएको छ। उमेरले सानै भए पनि ट्रेकिङप्रतिको उनको उत्साह, तयारी, आत्मविश्वास र मानसिक दृढताले स्थानीय समुदायलाई चकित मात्र बनाएको छैन, गर्वित पनि बनाएको छ।
उनकी आमा नूतन सरावगीले निब्को उपलब्धिप्रति खुसी व्यक्त गर्दै भनिन्,
निबले आफ्नो ठाउँ, समुदाय र उमेर समूहका बालबालिकालाई प्रेरणा दिन सक्ने काम गरेको छ। पूँनहिलले उसको धैर्यता, नेतृत्व क्षमता र आन्तरिक शक्ति अझ मजबुत बनाएको छ।
निब्को यस उपलब्धिलाई वीरगञ्ज तथा आसपासका समुदायले आत्मीयता र उत्साहका साथ स्वागत गरेका छन्। स्थानीय तहमा पनि यो सफलता बालबालिकालाई प्रकृतिप्रेम, साहसिक गतिविधि तथा स्वस्थ जीवनशैलीप्रति आकर्षित गर्ने प्रेरणास्रोत बन्ने अपेक्षा गरिएको छ।
