रक्सौल (पूर्वी चम्पारण)
लायन्स डिस्ट्रिक्ट ३२२ ई को स्थापना समारोह ‘आरोहण’ भारतको राजधानी पटनास्थित ताज होटलमा भव्य तथा गरिमामय वातावरणमा सम्पन्न भएको छ। कार्यक्रममा भारत तथा विदेशबाट आएका लायन्स पदाधिकारी, विशिष्ट अतिथि तथा समाजसेवीहरूको उल्लेखनीय सहभागिता रहेको थियो।
लायनिस्टिक वर्ष २०२६–२७ का लागि डिस्ट्रिक्ट गभर्नर लायन सङ्गीता नन्दाको अध्यक्षतामा सम्पन्न कार्यक्रममा केन्याबाट आएका लायन्स क्लब इन्टरनेशनल (२०२६–२७) का प्रथम अन्तर्राष्ट्रिय उपाध्यक्ष लायन डा. मनोज शाह तथा उनकी धर्मपत्नी लायन जेना शाह प्रमुख अतिथिका रूपमा सहभागी थिए। कार्यक्रममा पूर्व अन्तर्राष्ट्रिय निर्देशक लायन बी.के. लुथरा, बिहार सरकारका उपमुख्यमन्त्री विजय कुमार चौधरी, डा. झा, बिमल जैनलगायत पूर्व तथा वर्तमान गभर्नरहरूको पनि उपस्थिति रहेको थियो।
समारोहका अवसरमा लायन्स क्लब अफ रक्सौलका वरिष्ठ सदस्य लायन बिमल सर्राफ र लायन साइमन रेक्सलाई एलसीआईएफ (LCIF) मा उत्कृष्ट योगदान पुर्याएको कदरस्वरूप ‘एप्रिसिएसन अवार्ड’ प्रदान गरी सम्मान गरिएको थियो। उक्त सम्मानले रक्सौल लायन्स क्लबका सदस्यहरूमा हर्ष र गौरवको वातावरण सिर्जना गरेको छ।
कार्यक्रममा प्रथम उपडिस्ट्रिक्ट गभर्नर लायन अविनाश चौधरी, द्वितीय उपडिस्ट्रिक्ट गभर्नर लायन गीता शर्मा तथा डिस्ट्रिक्टका सम्पूर्ण पदाधिकारीहरूलाई पद तथा गोपनीयताको शपथ केन्याका प्रथम अन्तर्राष्ट्रिय उपाध्यक्ष लायन डा. मनोज शाहले गराएका थिए। शपथग्रहण समारोहले सेवा, समर्पण र नेतृत्वप्रतिको संगठनको प्रतिबद्धतालाई थप सुदृढ बनाएको सन्देश दिएको थियो।
प्रमुख अतिथि डा. मनोज शाहले आफ्नो सम्बोधनमा लायन्स आन्दोलनको भावना, मानव सेवाको महत्व तथा समाजप्रति लायन्स क्लबको दायित्वबारे विस्तृत चर्चा गर्दै सेवा कार्यसँगै समाजमा सकारात्मक परिवर्तन ल्याउनु नै लायन्स क्लबको मुख्य उद्देश्य रहेको बताए।
समारोहमा लायन्स क्लब अफ रक्सौलका पूर्व अध्यक्ष लायन बिमल सर्राफ, लायन नारायण रुंगटा तथा पूर्व कोषाध्यक्ष लायन अमित कुमारले सक्रिय सहभागिता जनाएका थिए। त्यस्तै, रक्सौल क्लबका पूर्व अध्यक्ष लायन साइमन रेक्स तथा पूर्व सचिव लायन मोहम्मद निजामुद्दीनले पनि डिस्ट्रिक्ट क्याबिनेटमा स्थान पाएका छन्। उनीहरूको सहभागिताले रक्सौल लायन्स क्लबको सशक्त उपस्थितिलाई थप उजागर गरेको थियो।
भव्य समारोहको सफल आयोजना तथा गरिमामय व्यवस्थापनका लागि सहभागी अतिथि, पदाधिकारी तथा सदस्यहरूले आयोजक समितिको प्रशंसा गरेका थिए। उक्त समारोहले लायन्स डिस्ट्रिक्ट ३२२ ई को नयाँ कार्यकाल (२०२६–२७) का लागि सेवा, नेतृत्व र संगठनात्मक सुदृढीकरणको स्पष्ट सन्देश दिएको आयोजकहरूले बताएका छन्।
