रक्सौल, २४ फागुन।
अन्तर्राष्ट्रिय महिला दिवसको अवसरमा रक्सौलस्थित काली मन्दिर परिसरमा काली सेनाद्वारा भव्य कार्यक्रम आयोजना गरिएको छ। कार्यक्रमको सञ्चालन काली सेनाकी राष्ट्रिय अध्यक्ष पार्वती तिवारीले गर्नुभएको थियो। यस अवसरमा काली सेनासँग आबद्ध महिलाहरूलाई सम्मान गर्दै उनीहरूको योगदानको प्रशंसा गरिएको थियो। कार्यक्रममा ठूलो सङ्ख्यामा महिलाहरू, समाजसेवी तथा गण्यमान्य व्यक्तिहरूको उपस्थिति रहेको थियो।
कार्यक्रमकी प्रमुख अतिथि अनुमण्डलीय अस्पतालकी उपाधीक्षक डा. स्वाति सपन थिइन्। उनले काली सेनासँग आबद्ध महिलाहरूको उत्साहवर्धन गर्दै काली मन्दिरका पीठाधीश्वर सेवक संजय नाथले काली सेना गठन गरी महिलाहरूलाई संगठित गर्दै आत्मनिर्भर बनाउने दिशामा सराहनीय पहल गरेको बताइन्। छोटो समयमै करिब ३५०० महिला यस संस्थासँग आबद्ध भई आत्मनिर्भर बन्ने मार्गमा अघि बढिरहेको उनले जानकारी दिइन्। धेरै महिलाहरू घरेलु उद्योगमार्फत आम्दानी गर्दै आफ्नो परिवारको आर्थिक अवस्था सुदृढ बनाइरहेका छन्।
डा. स्वाति सपनले अस्पतालमा प्रायः छोरी जन्मिँदा केही परिवार दुःखी हुने प्रवृत्ति देखिने गरेको बताउँदै यसलाई समाजको गलत सोच भएको उल्लेख गरिन्। उनले आजको समयमा छोरीहरू कुनै पनि क्षेत्रमा छोरा भन्दा कम नभएको भन्दै छोरीहरूलाई पनि समान शिक्षा र अवसर दिनुपर्ने बताइन्।
यसैगरी काली सेनाका सेवक संजय नाथले महिलाहरू जननी भएकाले समाजमा उनीहरूलाई सर्वोच्च सम्मान मिल्नुपर्ने बताए। उनले काली सेनाको मुख्य उद्देश्य महिलाहरूलाई संगठित गरी आत्मनिर्भर बनाउनु तथा समाजमा उनीहरूको सम्मान बढाउनु रहेको बताए।
कार्यक्रमका क्रममा सर्जन डा. विजय कुमारले पनि संस्थाको कार्यको प्रशंसा गर्दै काली सेनासँग आबद्ध प्रत्येक महिलालाई एलएम मेमोरियल अस्पतालमा उपचार गराउँदा ५० प्रतिशत विशेष छुट प्रदान गरिने घोषणा गरे। त्यसैगरी कार्यक्रममा उपस्थित राजद नेता सैफुल आजमले काली सेनाले महिलाहरूलाई घरेलु उद्योगसँग जोडेर आत्मनिर्भर बनाउने सराहनीय काम गरिरहेको बताए। निरुल्लाह खानले पार्वती तिवारीको नेतृत्वमा काली सेना समाजहितका कार्यमा निरन्तर सक्रिय रहेको र आगामी दिनमा पनि यस्ता समाजसेवी कार्यहरू जारी रहने विश्वास व्यक्त गरे।
कार्यक्रमको अन्त्यमा काली सेनासँग आबद्ध सयौँ महिलाको उपस्थितिमा महिला सशक्तीकरणको सशक्त सन्देश दिइएको थियो।
