रक्सौल, २३ फागुन
मानव तस्करी नियन्त्रणका लागि खटिएको AHTU–SSB ४७औँ वाहिनी तथा विभिन्न गैरसरकारी संस्थाको संयुक्त सतर्कताका कारण एक नाबालिग बालिकालाई उद्धार गरिएको छ। भारतबाट नेपालतर्फ लैजान लागिएको अवस्थामा रक्सौलस्थित मैत्री पुल नजिकै दुई जना संदिग्ध व्यक्तिसहित बालिकालाई नियन्त्रणमा लिइएको हो।
प्राप्त सूचनाका आधारमा सीमा क्षेत्रमा आवतजावत गर्ने व्यक्तिहरूमाथि निगरानी गरिरहेको AHTU–SSB ४७औँ वाहिनीको टोलीले भारतबाट नेपालतर्फ जाँदै गरेका दुई जना संदिग्ध व्यक्तिलाई एक नाबालिग बालिकासहित रोकेको थियो। प्रारम्भिक सोधपुछका क्रममा उनीहरूले आफ्नो नाम गोलु र सोनु बताउँदै बालिका आफ्नी बहिनी भएको र नेपालमा आफन्तको घर जाँदै गरेको बताएका थिए। तर उनीहरूको बयान शंकास्पद देखिएपछि टोलीले थप अनुसन्धान सुरु गरेको थियो।
अनुसन्धानका क्रममा प्रयास जुभेनाइल एड सेन्टर, स्वच्छ रक्सौल संस्था तथा ग्राम नियोजन केन्द्र (एनजीओ) को सहयोगमा तीनै जनालाई अलग–अलग राखेर सोधपुछ तथा काउन्सिलिङ गरिएको थियो। त्यस क्रममा उद्धार गरिएकी नाबालिग बालिका ‘रानी कुमारी’ (नाम परिवर्तन) मोतिहारीको पताही थाना क्षेत्रकी रहेको खुलासा भएको छ।
जाँचका क्रममा आरोपीहरू मोहम्मद अरमान (पर्सा जिल्ला, वीरगंज) र इकबाल अन्सारी (थाना शिकारपुर, नरकटियागञ्ज, बिहार) रहेको पत्ता लागेको छ। अनुसन्धान अनुसार अरमानले ‘गोलु’ नाम प्रयोग गरी करिब चार महिनाअघि टिकटकमार्फत बालिकासँग मित्रता गाँसेका थिए। पछि इकबाल अन्सारीसँग मिलेर विवाहको झुटो आश्वासन दिँदै बालिकालाई प्रेमजालमा फसाएका थिए।
आरोपीहरूले बहकाएर बालिकालाई घरबाट भाग्न लगाई मोतिहारी बस स्ट्यान्डमा बोलाएका थिए, जहाँबाट उनलाई भारतबाट नेपाल ल्याउने योजना बनाइएको थियो। तर AHTU–SSB टोलीको सतर्कता र समयमै गरिएको कारबाहीका कारण बालिकालाई सुरक्षित रूपमा उद्धार गर्न सफल भएको जनाइएको छ।
उद्धारपछि दुवै आरोपी र बालिकालाई थप कानुनी कारबाहीका लागि हरैया थानाको जिम्मा लगाइएको छ। घटनाबारे मुद्दा दर्ता गरी थप अनुसन्धान भइरहेको प्रहरीले जनाएको छ।
उद्धार अभियानमा AHTU प्रभारी इन्स्पेक्टर विकास कुमार, सहायक उपनिरीक्षक खेमराज, हवलदार अरविन्द द्विवेदी, सिपाही साधना सिन्हा र अन्जु मोहन सहभागी थिए। साथै प्रयास जुभेनाइल एड सेन्टरकी आरती कुमारी, राज गुप्ता, स्वच्छ रक्सौल संस्थाका रञ्जित सिंह, साबारा खातुन तथा ग्राम नियोजन केन्द्रका अरविन्द पाण्डे र रेखा देवीको पनि सहभागिता रहेको थियो।
