रक्सौल: भारतीय भूमि बन्दरगाह प्राधिकरण (एलपीएआई) र सशस्त्र सीमा बल (एसएसबी) को संयुक्त आयोजनामा भूमि सीमामा मानव बेचबिखन नियन्त्रणसम्बन्धी दुईदिने प्रशिक्षण कार्यशाला भूमि बन्दरगाह (आईसीपी) रक्सौलमा सफलतापूर्वक सम्पन्न भएको छ। यस कार्यक्रमको उद्देश्य सीमा क्षेत्रमा कार्यरत सुरक्षाकर्मी, अधिकारी तथा अन्य सरोकारवालाहरूलाई मानव बेचबिखनको पहिचान, रोकथाम र प्रभावकारी प्रतिक्रिया दिन सक्षम बनाउनु रहेको थियो।
उद्घाटन सत्रमा भिडियो कन्फरेन्समार्फत सम्बोधन गर्दै आईसीसीकी अध्यक्ष तथा सदस्य (वित्त) डा. रेखा बकर कुमारले मानव बेचबिखन एक गम्भीर सामाजिक अपराध भएको उल्लेख गर्दै यसविरुद्ध लड्न सतर्कता, संवेदनशीलता र संस्थागत समन्वय अत्यावश्यक रहेको बताउनुभयो।
कार्यक्रमका प्रमुख अतिथि ४७ औँ बटालियन एसएसबी रक्सौलका कमाण्डेन्ट श्री संजय पाण्डेले सीमावर्ती क्षेत्रमा मानव बेचबिखनका चुनौतीहरूबारे प्रकाश पार्दै विभिन्न सुरक्षा निकाय र सरोकारवाला संस्थाबीच सशक्त सहकार्य आवश्यक रहेको धारणा व्यक्त गर्नुभयो। भूमि बन्दरगाह (आईसीपी) का प्रबन्धक श्री राजीव रञ्जनले अतिथिहरूलाई स्वागत गर्नुभएको थियो।
कार्यक्रममा भूमि बन्दरगाहका उपप्रबन्धक रमन कुमार झा, सशस्त्र सीमा बलका उपकमाण्डेन्ट नवीन कुमार साहलगायत विभिन्न पदाधिकारीहरूको उपस्थिति रहेको थियो। कार्यक्रमको सञ्चालन कोमल कुमारीले गर्नुभयो भने सुरभी सिंह, अख्तर सैफी र श्याम कुमारले व्यवस्थापन तथा समन्वयको जिम्मेवारी सम्हालेका थिए।
पहिलो प्राविधिक सत्रमा पटना उच्च अदालतका वरिष्ठ अधिवक्ता सञ्जु सिंहले मानव बेचबिखनको परिभाषा, प्रकार, प्रमुख कारण तथा भारतमा देखिएका तथ्याङ्कीय प्रवृत्तिहरूबारे विस्तृत जानकारी दिनुभयो। साथै उहाँले मानव बेचबिखनसम्बन्धी कानुनी प्रावधान, नीतिगत ढाँचा तथा पीडित संरक्षणका कानुनी उपायहरूबारे सहभागीहरूलाई स्पष्ट पार्नुभयो।
यसपछि एसएसबीको मानव बेचबिखन विरोधी एकाइ र एक गैरसरकारी संस्थाको सहकार्यमा मानव बेचबिखनका संकेतहरू पहिचान गर्ने र वास्तविक जीवनका घटनामा छिटो तथा प्रभावकारी प्रतिक्रिया दिने विषयमा आधारित छोटो नाटकमार्फत व्यावहारिक प्रशिक्षण प्रदान गरियो।
दिउँसोको सत्रमा अधिवक्ता सञ्जु सिंहले पीडितको पहिचान, जोखिमका कारण तथा संरक्षणका उपायहरूबारे प्रकाश पार्दै प्रहरी, न्यायपालिका, गैरसरकारी संस्था, शिक्षक र समुदायका नेताहरूको भूमिकाबारे विस्तृत व्याख्या गर्नुभयो। साथै श्री दिग्विजय कुमारले उद्धार, पुनर्स्थापना तथा पुनर्एकीकरणका चुनौतीहरूबारे चर्चा गर्दै पीडितहरूको समग्र हेरचाह र दीर्घकालीन सहयोगको महत्त्वमा जोड दिनुभयो।
कार्यशालाको अन्त्यमा सहभागीहरूले सीमावर्ती क्षेत्रमा मानव बेचबिखन रोक्न थप सतर्क, संवेदनशील तथा समन्वित प्रयास गर्ने प्रतिबद्धता व्यक्त गरेका छन्।
कार्यक्रममा लायन्स क्लब रक्सौलका अध्यक्ष लायन बिमल कुमार सराफ, जोन अध्यक्ष लायन शम्भु प्रसाद चौरसिया, सचिव लायन एम. निजामुद्दीन, रञ्जित सिंह, आरती कुमारी, सिस्टर ग्रेसलगायत अन्य विशिष्ट व्यक्तिहरूको उपस्थिति रहेको थियो।
