वीरगंज – नेकपा एमाले पर्सा जिल्लाको आयोजनामा सम्पन्न बृहत् कार्यकर्ता भेलाले पर्सा जिल्लाको निर्वाचन क्षेत्र नम्बर–३ मा चुनावी माहोल थप तातेको छ। उक्त भेलामा परिवर्तनको सम्वाहक, भरोसा योग्य युवा उम्मेदवार रूपेश कुमार पाण्डेको सशक्त उपस्थितिले कार्यकर्तामा नयाँ ऊर्जा थपिएको छ।
भेलालाई सम्बोधन गर्दै उम्मेदवार पाण्डेले नेकपा एमालेमाथि भइरहेको चौतर्फी षड्यन्त्रलाई परास्त गर्न एकताबद्ध संघर्ष अपरिहार्य रहेको स्पष्ट पार्नुभयो। उहाँले मुलुकलाई राजनीतिक स्थायित्व, सुशासन र विकासको बाटोमा अघि बढाउन एमालेको नेतृत्व आवश्यक रहेको उल्लेख गर्दै पार्टीले अघि सारेका उम्मेदवारहरूलाई भारी मतले विजयी गराउन आह्वान गर्नुभयो।
जिल्ला अध्यक्ष विश्वम्भर शर्माको अध्यक्षता तथा नेकपा एमालेका केन्द्रीय कमिटी उपाध्यक्ष एवं पूर्व मन्त्री राम बहादुर थापा ‘बादल’को प्रमुख आतिथ्यमा सम्पन्न भेलामा हजारौँको संख्यामा नेता–कार्यकर्ता सहभागी भएका थिए। कार्यक्रममा जसपा लगायत विभिन्न दल परित्याग गरी ठूलो संख्यामा नेता तथा कार्यकर्ताहरू नेकपा एमालेमा प्रवेश गर्नुले पर्सामा एमालेप्रतिको जनविश्वास झनै मजबुत भएको संकेत गरेको छ।
कार्यक्रममा बोल्दै प्रमुख अतिथि थापा ‘बादल’ले सक्षम र जनउत्तरदायी उम्मेदवार एमालेको बलियो आधार भएको बताउँदै आगामी निर्वाचनमा निर्णायक जित सुनिश्चित हुने दाबी गर्नुभयो।
