रक्सौल, बिहीबार
रक्सौलको ब्लक रोडस्थित राजेश मस्करा सरस्वती शिशु मन्दिरमा आज बिहीबार विद्या भारती अखिल भारतीय शिक्षा संस्थानद्वारा “सप्तशक्ति संगम” कार्यक्रमको आयोजना गरिएको छ।
यस कार्यक्रमको उद्देश्य महिलाहरूमा आत्मविश्वास, नेतृत्व क्षमता र नारी शक्तिका विविध रूपहरूलाई उजागर गर्नु रहेको थियो।
कार्यक्रमको सुरुवात दीप प्रज्वलन, भारत माता पूजन र विद्याकी अधिष्ठात्री माता सरस्वतीको वन्दनाबाट गरिएको थियो।
कार्यक्रमकी संयोजक एवं अध्यक्ष सरिता देवीले आगन्तुक अतिथिहरूलाई चन्दन, फूलमाला र अंगवस्त्रद्वारा स्वागत गर्दै कार्यक्रमको उद्देश्यबारे विस्तृत जानकारी दिइन्।
कार्यक्रममा अतिथि परिचय र स्वागत अर्चना श्रीवास्तव, प्रस्तावना मेनका वर्मा, प्रश्नोत्तर सत्र सुधा मिश्र र मञ्च सञ्चालन ममता कुमारी चौबेले गरे।
त्यस्तै, बालिकाहरूले लोकसंस्कृति आधारित आकर्षक सांस्कृतिक प्रस्तुतिहरू प्रस्तुत गरे।
कार्यक्रमकी मुख्य वक्ता मधु शर्माले आफ्नो सम्बोधनमा कुटुम्ब प्रबोधन, वातावरण संरक्षण, समाजमा बढ्दो अपसंस्कृति र नारी सशक्तिकरणबारे प्रकाश पार्दै भनिन् नारीमा असीम सम्भावनाहरू छन्। महिलाहरूले आफ्नो क्षमताको पहिचान र विकास गर्न सके समाज परिवर्तन सम्भव हुन्छ। देश र विश्वका चुनौतीहरूको समाधान मातृशक्तिको ‘सप्तशक्ति जागरण’बाट मात्र सम्भव छ।
उनी भन्छिन् कुटुम्ब प्रबोधनको अर्थ परिवारका सबै सदस्यलाई एकत्रित गर्दै भारतीय संस्कृति, परम्परा र मूल्यहरूको पुनर्जीवन गर्नु हो, जसबाट सशक्त र नैतिक समाज निर्माण गर्न सकिन्छ।शर्माका अनुसार “सप्तशक्ति संगम” जस्ता कार्यक्रमहरूले महिलालाई नेतृत्व र संगठनात्मक क्षमता विकासको अवसर प्रदान गर्छन्।
कार्यक्रमको अन्त्यमा अध्यक्षीय सम्बोधन र धन्यवाद ज्ञापन सरिता देवीले गरिन्।यस अवसरमा विद्या मन्दिरका चम्पारण विभाग निरीक्षक ललित कुमार यादव, शिशु मन्दिर रक्सौलका संरक्षक डा. प्रो. राजकिशोर सिंह, विद्यालय प्रबन्ध समिति अध्यक्ष प्रो. जगदीश प्रसाद, उपाध्यक्ष रजनीश प्रियदर्शी, सचिव अवधेश सिंह, कोषाध्यक्ष गिरधारीलाल श्रीवास्तव, प्रधानाध्यापक राजू कुशवाहा, आचार्य रमेशकुमार पाण्डेय, गगनदेव पाठक, सुमितकुमार, चकिया शिशु मन्दिरका प्राचार्य रञ्जनकुमार, अनिलकुमार चौधरी, घोडासहन शिशु मन्दिरका प्राचार्य प्रकाश ठाकुर, युगलकिशोर पाण्डेय लगायत अभिभावक र सैकडौं महिलाहरूको सहभागिता रहेको थियो।
