अभिलाष गुप्ता
बीरगंज, २७ कार्तिक
“खेली मधेश, जीती मधेश” भन्ने नाराका साथ राष्ट्रिय खेलकुद परिषद् अन्तर्गत पर्सा जिल्ला खेलकुद विकास समितिले आफ्नो प्रथम वार्षिक उत्सव आज वीरगंजमा भव्य रूपमा सम्पन्न गरेको छ।
कार्यक्रमको अवसरमा खेलकुद परिषद्को कार्यालय परिसरमा सरसफाइ, पेन्ट–रोगन तथा दीप प्रज्वलन कार्यक्रमको आयोजना गरिएको थियो। कार्यक्रममा सहभागीहरूले खेलकुद क्षेत्रलाई सफा, सुन्दर र अनुशासित राख्ने सन्देशका साथ सरसफाइ अभियान सञ्चालन गरेका थिए।
उक्त कार्यक्रम दिपक साह कानुको अध्यक्षतामा सम्पन्न भएको थियो।
कार्यक्रमका प्रमुख अतिथि वीरगंज महानगरपालिका–४ का वडा अध्यक्ष जगत साह कानुले खेलकुदको माध्यमबाट युवाहरूमा एकता, स्वास्थ्य र अनुशासनको भावना विकास हुने बताए। उहाँले मधेशमा खेलकुदको स्तर उकास्न सबै पक्षको साझा प्रयास र सहकार्य आवश्यक रहेको उल्लेख गर्दै भने खेलकुदले युवालाई सकारात्मक सोच र नेतृत्व क्षमतामा उचो बनाउँछ। युवाहरू खेलमा संलग्न भए मधेशको गौरव अझ माथि उठ्नेछ।
यस्तै, जिल्ला खेलकुद विकास समितिका कार्यालय प्रमुख नाजिर हुसैन अन्सारीले कार्यालयले स्थापना कालदेखि हालसम्मका गतिविधिहरूको जानकारी दिँदै भने हामीले खेलकुद संरचनाको सुधारका लागि निरन्तर काम गरिरहेका छौं। कार्यालय परिसरमा खानेपानी ट्यांकी, खेल मैदान मर्मत तथा खेल सामग्री सुधारका काम सम्पन्न गरिसकिएको छ।
कार्यक्रममा विभिन्न खेल संघका प्रतिनिधि र खेलकर्मीहरूको उल्लेखनीय सहभागिता रहेको थियो।
विशेष अतिथिहरूमा पर्सा जिल्ला ब्याडमिन्टन संघका अध्यक्ष नरेश कायस्थ, जुडोका वरिष्ठ प्रशिक्षक पृथ्वी आलोक, सितोरिया कराते संघका प्रशिक्षक दिलीप कुमार पटेल, टाइक्वान्डोका वरिष्ठ खेलाडी विक्रम डङ्ग्गोल, जिल्ला प्रहरी कार्यालय पर्साका वरिष्ठ प्रहरी हवलदार रामबहादुर, साथै विभिन्न सञ्चारकर्मी, खेलकर्मी र स्थानीय युवाहरू उपस्थित थिए।कार्यक्रमले खेलकुद क्षेत्रमा मधेशका युवाहरूमा ऊर्जा, एकता र सकारात्मक सोचको सन्देश फैलाएको आयोजक समितिले जनाएको छ।
