दिपेश कुमार शाह /रौतहट
लोकआस्थाको महान पर्व छठको अवसरमा नेकपा (एमाले) का केन्द्रीय सदस्य तथा लोकप्रिय नेता कुन्दन कुशवाहाले आज रौतहट जिल्लाको कटहरिया नगरपालिका र गुजरा नगरपालिकाका विभिन्न छठघाटहरूको अनुगमन गर्दै छठमाताको पूजा-अर्चना गरेका छन्। उनले भक्तजनहरू बीच पुगेर शुभकामना आदानप्रदान गर्दै छठ पर्वले ल्याउने एकता, आस्था र सामाजिक सद्भावको सन्देशबारे उल्लेखनीय विचार व्यक्त गरे।
अनुगमनका क्रममा स्थानीय नेता, पार्टीका कार्यकर्ता, जनप्रतिनिधि, सुरक्षाकर्मी र स्थानीय वासिन्दाहरूको ठूलो उपस्थिति रहेको थियो। नेता कुशवाहाले प्रत्येक घाटमा भक्तजनहरूको भीड, धार्मिक वातावरण र सुरक्षाको अवस्था अवलोकन गर्दै नगरपालिका र स्थानीय समुदायद्वारा गरिएको तयारीको सराहना गरे। उनले छठ पर्व केवल धार्मिक विधि नभई, स्वच्छता, अनुशासन र सामुदायिक एकताको उत्कृष्ट उदाहरण भएको बताए।
नेता कुशवाहाले भने, “छठ पर्व हाम्रो संस्कृति, सहिष्णुता र आस्थाको साझा प्रतीक हो। यसले नेपाली समाजमा एकता र आपसी माया बढाउँछ। नगरपालिकाहरूले यस पर्वको गरिमा जोगाउँदै स्वच्छता, सरसफाइ र भक्तजनहरूको सुरक्षामा निरन्तर ध्यान दिनुपर्छ।
उनले जनप्रतिनिधि र प्रशासनलाई छठघाटको स्थायी सुधारका काममा निरन्तरता दिन सुझाव दिए। साथै, स्थानीय युवाहरूले घाटको व्यवस्थापन, सरसफाइ र सजावटमा देखाएको उत्साहप्रति उनले प्रशंसा जनाए।
कुशवाहाले छठमातासँग देशमा शान्ति, समृद्धि र एकताको कामना गर्दै देशभरका श्रद्धालु भक्तजनहरूलाई शुभकामना दिएका छन्। उनले भनें छठ माताको कृपाले हामी सबैमा उन्नति, स्वास्थ्य र सद्भाव फैलोस्।
कार्यक्रमका क्रममा स्थानीय कार्यकर्ताहरूले कुशवाहालाई फूलमाला र टीका लगाएर स्वागत गरे। छठघाटमा महिलाहरूले व्रत बस्दै अस्ताउँदो सूर्यलाई अर्घ्य दिँदै धर्म–आस्थामा लीन देखिन्थे। वातावरणमा भक्तिपूर्ण गीत, स्वच्छता र अनुशासनले विशेष रौनक थपेको थियो।
भक्तजनहरूले भने, “नेता कुशवाहाको उपस्थितिले हामीलाई हौसला र सम्मान मिलेको छ। उहाँको सादगी र जनताप्रतिको माया साँच्चिकै प्रशंसनीय छ।
यस अवसरमा नेकपा (एमाले)का स्थानीय नेता तथा विभिन्न वडा कमिटीका प्रतिनिधिहरू पनि सहभागी थिए। कार्यक्रमको अन्त्यमा नेता कुशवाहाले आगामी दिनमा जनताको बीचमा रहेर सेवा, विकास र सद्भावको अभियानलाई अझ सशक्त बनाउने प्रतिबद्धता व्यक्त गरे।
